اسلام آباد(کے ٹو ) وزیر اعلیٰ گلگت بلتستان سید مہدی شاہ نے کہا ہے کہ میں نے اپنی طرف سے کبھی نہیں کہا کہ عطا آباد جھیل نہیں ٹوٹے گی بلکہ یہ ماہرین کی رپورٹس تھیں تا ہم گلگت بلتستان حکومت نے جھیل ٹوٹنے کے ممکنہ خطرے کے پیش نظر تمام ممکنہ حفاظتی انتظامات مکمل کر لئے ہیں کے پی این سے خصوصی بات چیت کرتے ہوئے انہوں نے کہا کہ جھیل ٹوٹنے کی صورت میں متاثر ہونے والے افراد کو محفوظ جگہوں پر منتقل کیاجائے گا اور انہیں تمام سہولیات پہنچائی جائیں گی حکومت کوئی دقیقہ فروگزاشت نہیں کرے گی انہوں نے کہا کہ دو ماہ کا راشن سٹاک کر لیا گیا ہے اور ہنگامی حالت سے نمٹنے کیلئے حکومت دستیاب وسائل کے اندر رہتے ہوئے پوری طرح الرٹ ہے گلگت اور نگر ہنزہ کی انتظامیہ کو خصوصی ہدایات جاری کر دی گئی ہیں کہ وہ جھیل سے پیدا ہونے والی صورتحال پر کڑی نگاہ رکھے اور لمحہ بہ لمحہ کی رپورٹ سے آگاہ رکھا جائے انہوں نے کہا کہ صدر اور وزیر اعظم سے مسلسل رابطے میں ہیں اور ان کی ہدایات پر تمام پیشگی انتظامات مکمل کئے گئے ہیں انہوں نے کہا کہ اپوزیشن جھیل کے معاملے پر خواہ مخواہ میں شور مچانے کی بجائے متاثرین کودرپیش مشکلات کو دور کرنے کیلئے ہمارے ساتھ مل کر چلے ، تنقید برائے تنقید مسئلے کا حل نہیں ایک سوال کے جواب میں انہوں نے کہا کہ مسلم لیگ(ق)کی مجرمانہ غفلت کے باعث آج گلگت بلتستان میں ہمیں یہ دن دیکھنا پڑ رہا ہے انہوں نے کہاکہ عوام مایوس نہ ہوں حکومت متاثرین کی مشکلات کے حل میں کوئی غفلت نہیں برتے گی ایک اور سوال کے جواب میں انہوں نے کہا کہ متحدہ قومی موومنٹ کے رہنما سید حیدر عباس رضوی کو کراچی میں بیٹھ کر گلگت بلتستان سے متعلق بیانات دینے کا بڑا شوق ہے تو وہ اپنا شوق پورا کرتے رہے انہوں نے کہا کہ گلگت بلتستان کے مفاد ہم خود جانتے ہیں اور ہم خود ان کے تحفظ کو یقینی بنائیں گے کوئی دوسرا ہمارے معاملات میں دخل اندازی نہ کرے۔ ایک سوال کے جواب میں انہوں نے کہا کہ سرمایہ کاری کانفرنس لاہور چیمبر آف کامرس کی جانب سے منعقد کی گئی تھی گلگت بلتستان چیمبر آف کامرس والے بھی اس طرح کے پروگرامز کریں تو مقامی حکومت ان کی بھرپور مدد کرے گی اور ان کے ساتھ مکمل تعاون کیا جائے گا کوئی معاہدہ طے ہونا تھا تو چیمبر آف کامرس کو ضرور اعتماد میں لیا جاتا مگر ایسا کچھ نہیں ہوا ہے